Ministrja e Kulturës, Rinisë dhe Sportit, Vlora Dumoshi, sot në 16:30, para Teatrit Kombëtarë të Kosovës do të bëjë homazh për aktoren, Leze Qena.

Në njoftimin thuhet se shkak të situatës së pandemisë së virusit SARS CoV-2 nuk mund të organizohen aktivitet publik për ta nderuar aktoren, shkruan arbresh.info.

“Për shkak të situatës së pandemisë së virusit SARS CoV-2 nuk mund të organizojmë aktivitet publik për ta nderuar të ndjerën, aktoren tonë të madhe Leze Qena.

Por, para Teatrit Kombëtar të Kosovës, Ministrja e Kulturës, Rinisë dhe Sportit, Vlora Dumoshi, sot (25.03.2020), ora 16:30, do të bëjë homazhe për ta nderuar figurën e të madhes Leze Qena, ku njëherësh do ta ngushëllojë edhe vajzën e të ndjerës.

Ftohen mediat ta ndjekin këtë ngjarje, duke i respektuar këshillat e institucioneve përkatëse shëndetësore për distancën publike”, thuhet në njoftim.

Ndryshe aktorja, Leze Qena ka ndërruar jetë sot.

Lajmin e trishtë e ka konfirmuar për portalin arbresh.info zëdhënësi i QKUK-së, Shpend Fazliu.

“Ju konfirmojmë se nga data 6 mars ajo ka qenë në mjekimin intensiv dhe përkundër kujdesit maksimal nga stafi, ajo ka vdekur në ora 9.50, në mjekimin intensiv qendror”- ka thënë Fazliu.

Aktorja mori pjesë në shumë filma e seriale për dekada me radhë, së fundi ishte pjesë e serialit “Cka ka shpija”.

Sonte nga ballkonet do të ndezen qirinj për nder të Leze Qenës

Vdes aktorja e njohur, Leze Qena